جنسی معاملات انسانی زندگی کا اہم ترین حصہ ہیں جن کے لیے ثبوت کی ضرورت نہیں کیونکہ وہ بالکل واضح اور اچھی طرح سمجھے جانے والے معاملات ہیں۔ لہذا ایسی چیزوں کی وضاحت کرنے کی ضرورت نہیں ہوتی جو ظاہر اور واضح ہوں۔ اللہ تعالیٰ نے جو نظام زندگی بنایا ہے اس میں انسان کی ساخت کے اندر فطری طور پر جنسی توانائی کو محفوظ رکھا ہے اور یہ توانائی بہت بڑی نعمت ہے۔
آج دنیا میں جو نسلیں اور لوگ موجود ہیں وہ اسی جنسی توانائی کی وجہ سے ہیں۔ لہذا انسان کے اندر اس چیز کا پایا جانا نقص نہیں بلکہ کمال اور حکمت ہے اور نسل انسانی کو آگے بڑھانے کا ذریعہ ہے۔ لہذا اس توانائی کے اندر پائی جانے والی قوت کے پیش نظر اس کو منظم اور کنٹرول کرنے اور اسے صحیح سمت دینے کی ضرورت ہے۔ علمائے اخلاق کا کہنا ہے کہ انسان کی زندگی کے تمام امور سے متعلق اسلام میں آداب اور دستورات موجود ہیں حتیٰ کہ واش روم جانے کے بھی آداب ہیں۔ لہٰذا، یہ کیسے ممکن ہے کہ یہ اتنا بڑا عنصر رہنمائی کے بغیر رہ جائے؟ جبکہ اس توانائی کے انسانی زندگی پر بہت سے اثرات مرتب ہوتے ہیں اس لیے اسے تحفظ کی ضرورت ہے۔

جنسی توانائی کا الہی ضابطہ
جنسی توانائی کو منظم کرنے کے لیے اللہ کی طرف سے پیش کیا گیا منصوبہ تقویٰ، شادی اور عفت ہے۔ تقویٰ مجموعی طریقہ ہے، اور تقویٰ حاصل کرنے کے لیے ہمیں نکاح اور شادی کی ضرورت ہے۔ اور اگر نکاح ممکن نہ ہو تو عفت کا راستہ اختیار کیا جائے گا۔ شادی جنسی معاملات کو منظم کرنے کا الہی منصوبہ ہے۔
جنسی توانائی کے تحفظ کے لیے پہلا اصول شرمگاہوں کی حفاظت کرنا ہے، جو ہر عمر کے افراد کے لیے عام ہے سوائے بہت چھوٹے بچوں کے جو ممیز نہیں ہیں۔ دوسرا حکم اور اصول نکاح ہے جسے ازدواج اور شادی کہتے ہیں اور اس کی وضاحت پہلے ہو چکی ہے۔ اس کا مطلب ہے کہ مرد اور عورت دونوں اپنی شخصیت کو ایک دوسرے میں ضم کر دیتے ہیں۔

شادی ایک الہی نشانی کے طور پر
نکاح کے کچھ آداب ہیں اور اللہ تعالیٰ نے سورہ روم کی آیات 20 اور 21 میں اسے الٰہی نشانی قرار دیا ہے۔
وَمِنْ آيَاتِهِ أَنْ خَلَقَكُمْ مِنْ تُرَابٍ ثُمَّ إِذَا أَنْتُمْ بَشَرٌ تَنْتَشِرُونَ {20}
اور اس کی نشانیوں میں سے ایک یہ بھی ہے کہ اس نے تمہیں خاک سے پیدا کیا ہے اور اس کے بعد تم بشر کی شکل میں پھیل گئے ہو۔
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ {21}
اور اس کی نشانیوں میں سے یہ بھی ہے کہ اس نے تمہارا جوڑا تم ہی میں سے پیدا کیاہے تاکہ تمہیں اس سے سکون حاصل ہو اورپھر تمہارے درمیان محبت اور رحمت قرار دی ہے کہ اس میں صاحبانِ فکر کے لئے بہت سی نشانیاں پائی جاتی ہیں۔
یہ اللہ کی نشانیوں میں سے ہے کہ اس نے تخلیق کے بعد تمھارا جوڑا تم میں سے ہی بنایا۔ اللہ کی پہلی بڑی نشانی جو ان آیات میں بیان ہوئی ہے انسان کی مٹی سے تخلیق ہے پھر دوسری بڑی نشانی شادی ہے۔ اللہ نے شادی کو اپنی نشانی بنایا ہے لیکن ہم نے آسانی سے اسے نظر انداز کر دیا۔ قرآن کے مطابق بیویاں سب اللہ کی نشانیاں ہیں تاکہ تم ان کے پاس سکون حاصل کر سکو۔

شادی میں سکون سے مراد جذباتی سکون
شادی کے بغیر انسان کو سکون نہیں ملتا۔ جب انسان جوان ہو جائے گا تو اسے ماں یا باپ کی بانہوں میں سکون نہیں ملے گا۔ بلکہ اللہ نے اس کے لیے جو امن و سکون کی جگہ بنائی ہے وہ شادی ہے۔ انسان کو زندگی میں سکون کی سخت ضرورت ہوتی ہے اور اگر اسے سکون نہ ملے تو وہ پریشان ہو جاتا ہے۔
اگر ہم ایک بچے کو آرام دہ بستر فراہم نہیں کرتے ہیں، تو بچہ روتا ہے؛ اسی طرح ایک نوجوان کو بھی امن کا گہوارہ چاہیے جو کہ بیوی ہے۔ پھر شادی کے بعد اللہ اس جوڑے کو جو تحفہ دیتا ہے وہ "مودت” (محبت، پیار) اور "رحمت” (ہمدردی) ہے- جس طرح لوگ شادی کی تقریبات میں شرکت کرتے وقت تحائف دیتے ہیں۔ دوستوں اور رشتہ داروں کو ہمیشہ تحفہ دینا چاہیے کیونکہ یہ دلوں کو نرم کرتا ہے اور شکوے اور شکایتوں کو دور کرتا ہے۔
اگر عورت مرد کو سکون اور چین فراہم کرے تو کوئی مرد گھر سے نہیں بھاگے گا کیونکہ شادی کے پیچھے ایک اہم مقصد یہی ہے۔

الہی تحفے: مودت اور رحمت
ہم انسانی زندگی اور شادی کا قلمی خاکہ پیش کر رہے ہیں۔ لیکن اللہ تعالیٰ نے اس کا 3D نقشہ پیش کیا ہے جس میں زندگی کے ہر معاملے کی جسمانی، روحانی اور سماجی جہتیں دکھلائی ہیں۔
جب شادی ہوتی ہے تو جوڑے کو اللہ کی طرف سے مودت اور رحمت کا تحفہ ملتا ہے۔ رسول اللہ صلی اللہ علیہ وآلہ وسلم نے بھی ایسا ہی کرنے کی کوشش کی- آپ نے مدینہ میں اوس اور خزرج کے دو قبیلوں میں یہ صفات پیدا کیں۔
آج ہمارے معاشرے میں محبت اور پیار اکثر شادی سے پہلے مرد اور عورت کے درمیان تعلقات کے طور پر ظاہر ہوتا ہے، جسے ہم "محبت کی شادی” کہتے ہیں۔ لیکن اللہ کہتا ہے کہ یہ محبت شادی کے بعد عطا اور قائم ہوتی ہے۔
گمراہ محبت اور الہی محبت کا حقیقی مفہوم
ہم نے اس موضوع کے بارے میں اپنی گفتگو کا آغاز ہم جنس پرستی سے متعلق سورہ ہود کی آیت سے کیا تھا جس کے بارے میں اللہ نے تقویٰ حاصل کرنے کا حکم دیا۔ تو، اگر ہم جنس پرستوں کی طرح، ایک آدمی کسی مرد سے محبت کرتا ہے، تو کیا یہ حقیقی محبت سمجھی جائے گی؟ یہ ہوس ہے محبت نہیں۔ اسی طرح شادی سے پہلے کی محبت بھی ہوس ہے حقیقی محبت نہیں۔ شادی کے بعد مرد اور عورت کے دلوں میں اللہ کی طرف سے سچی محبت عطا ہوتی ہے۔
اللہ تعالیٰ آیت میں فرماتا ہے کہ اس نے تمہارے ساتھی کو تمہارے نفس سے پیدا کیا تاکہ تم اس کے پاس سکون حاصل کر سکو اور پھر اللہ تمہیں محبت اور رحمت سے نوازے گا۔ ہمارے معاشرے میں والدین شادی پر لڑکیوں کو جہیز دیتے ہیں حالانکہ عورت کی زندگی کا تمام سامان مہیا کرنا مرد کا فرض ہے۔
لڑکی کے والد کی طرف سے دیا جانے والا جہیز، اسلامی کلچر نہیں ہندو کلچر ہے۔ اگر آپ لڑکی کو جہیز دے کر اس کے گھر کا سارا سامان مہیا کر دیتے ہیں اور پھر جس مرد کو اپنی لڑکی دی ہے وہ کس کام ہے؟ اس کی اپنی صلاحیتیں کیا ہیں؟ شادی کے بعد بھی عورت کو پیسے کمانے یا فیکٹریوں اور دفتروں میں کام کرنے کے لیے نہیں بنایا گیا۔ اس کا مقصد اپنے شوہر اور پورے خاندان کو سکون فراہم کرنا ہے۔
محبت اور ہمدردی عمل میں
صحیح جگہ شادی ہو گی تو محبت نظر آئے گی۔ اس کے بعد رحمت اور ہمدردی بھی دکھائی دے گی یعنی مرد عورت پر غیر ضروری تسلط جمانے کے بجائے نرمی اور ہمدردی سے کام لے گا۔ محبت ایسی ہونی چاہیے کہ ظاہر ہو۔ مودت وہ محبت ہے جس کا اظہار ہونا ضروری ہے، یہ وہ تحفہ ہے جو اللہ میاں بیوی کو دیتا ہے، اور جو اسے حاصل کرتا ہے اسے شکر گزار ہونا چاہیے۔
رحمت کا مطلب ہے کسی کی رکاوٹوں اور مشکلات کو دور کرنا اور اس کی ضروری ضروریات کو پورا کرنا۔ مرد اور عورت دونوں کو اپنے اندر رحمت پیدا کرنی چاہیے۔ جس طرح ایک ماں بچے کے رونے پر اس کی ضروریات کو سمجھ جاتی ہے — یہ سائنسی طور پر ثابت ہے کہ بچے کے رونے کے انداز اس کی ضروریات کے لیے مختلف ہوتے ہیں — اور صرف ماں ہی اس لہجے کو سمجھتی ہے اور اسے فوراً پورا کرتی ہے، جس سے بچے کو سکون ملتا ہے۔
اسی طرح عورت کے اسلوب اور برتاؤ سے مرد کو چاہیے کہ وہ اپنی بیوی کی ضرورتوں کو سمجھے اور انہیں وقت پر پورا کرے، یہی رحمت ہے۔ نفسیاتی ضروریات جسمانی ضروریات سے بھی زیادہ اہم ہیں۔ جذبات مرد اور عورت دونوں کی باہمی ضرورت ہیں۔

خاندانی ثقافت اور ہمدردی کی عدم موجودگی
مردوں کے اعصاب اکثر پریشان ہوتے ہیں اور انہیں سکون کی ضرورت ہوتی ہے۔ ہماری ثقافت میں، ہم اکثر خاندانوں میں طنز کرتے ہیں—ایسے تبصرے کرتے ہیں جن سے دوسروں کو تکلیف ہوتی ہے۔ جو لوگ دوسروں کو طعنے دیتے ہیں وہ اس کے ذریعے اپنے دلوں میں سکون پاتے ہیں لیکن ایسے لوگ بیمار ہوتے ہیں۔ بہو سے کوئی غلطی ہو جائے تو اسے طعنہ دیا جاتا ہے اور اس کے والدین اور دادا دادی کی توہین کی جاتی ہے۔

رحمت کا مطلب ہے کسی کی حقیقی ضرورتوں کو پورا کرنا۔ قرآن کہتا ہے کہ یتیموں کو عزت دو، لیکن ہمارے معاشرے میں ہم ان کی مدد کرتے ہوئے ان کی توہین کرتے ہیں۔ یتیم کی سب سے بڑی ضرورت جذباتی دیکھ بھال ہے۔ اس نے اپنے والد کو کھو دیا ہے، اور جو کچھ ایک باپ اپنے بچے کو فراہم کرتا ہے وہ یتیم کی ضرورت ہے۔
اگر کوئی عورت اپنے شوہر کی تذلیل کرے تو اس سے عزت و تکریم کی توقع نہیں رکھی جا سکتی۔ وہ ایک ذلیل شخص کے ساتھ رہ رہی ہے، اس لیے اسے بدلے میں وہی ملے گا۔ جو عورتیں اپنے شوہروں کی توہین اور تذلیل کرتی ہیں وہ آخر کار اپنے بچوں کے ہاتھوں ذلیل و خوار ہوتی ہیں اور معاشرے میں عزت نہیں پاتی ہیں۔

غور کرنے والوں کے لیے نشانیاں
آیت میں کہا گیا ہے کہ اللہ تعالیٰ نے تمہارے درمیان مودت اور رحمت قائم کی ہے اور میاں بیوی کے درمیان یہ صلح، محبت اور ہمدردی ان لوگوں کے لیے نشانیاں ہیں جو غور و فکر کرتے ہیں۔ یہ نشانیاں ان کے سامنے ہیں لیکن اگر وہ جاہل یا اندھے ہوں تو اللہ کی یہ نشانیاں نہیں دیکھ سکتے۔ وہ اپنے خاندان یا معاشرے میں ان علامات کو نہیں پہچان سکتے کیونکہ وہ اپنے گھروں میں محبت اور شفقت کو داخل نہیں ہونے دیتے۔

رشتوں میں تلخی اور رحمدلی
رشتوں میں تلخی بھی ظاہر ہو سکتی ہے۔ بعض اوقات عورتیں اپنے بچوں کو ڈانٹتی ہیں لیکن بچہ کبھی ماں سے نفرت نہیں کرتا کیونکہ وہ اس کے غصے کے پیچھے محبت دیکھ سکتا ہے۔ میاں بیوی کے درمیان تلخی کا معاملہ بھی ایسا ہی ہونا چاہیے۔
جو گھر میدان جنگ بن جائے اس پر اللہ کی رحمت نہیں ہو گی۔ یہ اللہ کی نشانیاں ہیں جن کا مطالعہ اور ان پر غور و فکر کرنا چاہیے تاکہ آپ کی ازدواجی زندگی میں سکون ہو۔
طلاق اور سماجی توازن کا کردار
شادی میں اور بھی مسائل ہیں جن کا قرآن نے بھی احاطہ کیا ہے، بشمول طلاق، جو رشتوں کے ناقابل برداشت ہونے پر ایک اور راستہ فراہم کیا جاتا ہے۔ یہ اللہ کے بنائے ہوئے نظام حفاظت کا حصہ ہے۔

اگر ازدواجی زندگی پرامن ہو جائے تو زندگی کے تمام معاملات پرامن ہو سکتے ہیں۔ لیکن اگر یہ جہت مضطرب ہو جائے تو زندگی کے دیگر تمام شعبے بھی غضب اور مصائب سے بھر جاتے ہیں۔ پروردگار عالم سے دعا ہے کہ وہ ہمارے گھروں میں سکون پیدا کرے اور محبت اور رحمت کی نعمتوں سے ہمیں نوازے۔

خطبہ 2
غزہ – انسانیت کا جاری امتحان
غزہ انسانیت کا امتحان رہا ہے۔ یہ جنگ جاری ہے لیکن ایک واقعہ جو شرم الشیخ میں حالیہ دنوں پیش آیا، وہ ہے ظالموں اور مظلوموں کے درمیان معاہدہ۔ مدعو کیے گئے پچیس اقوام میں سے بدترین اور ذلت آمیز فعل کا ارتکاب وزیر اعظم پاکستان نے کیا ہے۔ یہ سب لاڈلے اور چاپلوس لوگ ہیں جو ظالموں کے جوتے چاٹتے ہیں۔ یہ ساری قومیں جوتے چاٹنے چلی گئیں اور اس ذلت اور چاپلوسی کا طوق پاکستان نے پہن لیا۔

انسانی قیمت اور منافقانہ امن مذاکرات
ظالموں کے فراہم کردہ اعداد و شمار بتاتے ہیں کہ انہوں نے غزہ میں 70,000 افراد کو قتل کیا ہے اور ان میں سے 30,000 کے قریب بچے اور خواتین ہیں۔ انہوں نے پورے شہر کو برباد کر دیا ہے، اور اب وہ امن کا معاہدہ کر رہے ہیں۔ پہلے دو سال سے سب دیکھ رہے تھے اور اب کھنڈرات پر امن قائم کرنے آئے ہیں۔ اب وہ ایک دوسرے کو امن کے قیام کی مبارکباد دے رہے ہیں۔ غزہ کے امتحان نے انہیں رسوا کر دیا ہے۔ اگر یہ قربانیاں نہ ہوتیں تو دنیا کو کیسے معلوم ہوتا کہ یہ کتنے ذلیل و رسوا حکمران ہیں۔

امریکہ کا کردار اور پاکستان کا ذلت آمیز رویہ
امریکہ نے اقوام متحدہ میں نسل کشی روکنے کی قرارداد کو چھ بار مسترد کیا۔ وہ فلسطینیوں کو مار کر ان کی نسل کو ختم کرنا چاہتے تھے۔ جس نے یہ کیا، جس نے اسرائیل کا ساتھ دیا، اسے ہتھیار دئے اور اسرائیل کو ہر ممکن مدد فراہم کی، وہ اب امن پسند بن چکا ہے اور اس کی سفارش نوبل انعام کے لیے کی گئی ہے۔ امن انعام کے لیے اس بڑے ظالم کی سفارش کرنے کا کریڈٹ پاکستان کو گیا ہے۔ اہل غزہ نے تاریخ کے تمام ذلیل لوگوں کو شکست دی ہے۔ اب وہ جو جنگ سے حاصل نہیں کر سکے وہ امن کے ذریعے حاصل کرنے کی کوشش کریں گے۔

دنیا کے نقاب چہرے اور مزاحمت
دنیا میں تین طرح کے لوگوں کے چہرے بے نقاب ہو چکے ہیں؛
ایک وہ ظالموں کا گروہ ہے جنہوں نے ظلم کیا اور واضح طور پر بے نقاب ہوئے۔
دوسرا گروہ مزاحمتی لوگوں کا ہے جن کی شجاعت اور شہامت پوری دنیا نے دیکھ لی۔
تیسرا گروہ منافقین کا ہے جو فلسطین کے حامی ہونے کا دعویٰ کرتے تھے لیکن جب وقت آیا تو وہ مکار و منافق نکلے۔ یہ لوگ مظلوموں کی مدد کر سکتے تھے لیکن انہوں نے انہیں ظالموں کے رحم و کرم پر چھوڑ دیا۔
یہ منافقین کا گروہ سب سے بڑا ہے۔ مزاحمتی لوگ اقلیت میں ہونے کے باوجود اچھی تعداد میں ہیں جو سڑکوں پر نکل آئے۔

نسل کشی اور عرب ریاستوں کا کردار
کہا جا رہا ہے کہ جنگ ختم ہو گئی ہے لیکن یہ جنگ نہیں تھی کیونکہ جنگ دو فوجوں کے درمیان ہوتی ہے نہ کہ عورتوں اور بچوں کے ساتھ۔ اسرائیل اور امریکہ نے جو کیا وہ نسل کشی تھی اور یہ سلسلہ جاری رہے گا۔ وہ فلسطینیوں کو شکست دینے یا ان کے اسیروں کو رہا کرانے کے قابل نہیں تھے۔ مصر میں شیاطین کا ٹولا جمع ہوا، اور تین ممالک – قطر، مصر اور ترکی نے حماس کو دھمکی دی کہ وہ ان کے افراد کو گرفتار کر کے امریکہ اور اسرائیل کے حوالے کر دیں گے جو فلسطین سے باہر رہ رہے ہیں۔ انہوں نے سب سے گھناؤنا کردار ادا کیا اور جو اسرائیل نہ کر سکا وہ کرنے کا عہد کیا۔ یہ امام حسن (ع) اور معاویہ کے درمیان صلح کا واقعہ تھا۔

نام نہاد امن منصوبہ اور اس کا حقیقی ایجنڈا
حقیقت واضح ہے نہ مزاحمت رکی ہے نہ ظلم۔ چونکہ اب دشمن اس امن معاہدے کے ذریعے غزہ کو تباہ کرنے کے وہی اہداف حاصل کرنا چاہتا ہے، اس لیے مزاحمت کو جاری رکھنا ہوگا۔ انہوں نے غزہ میں اصلاحات کا منصوبہ بنایا ہے جہاں ٹرمپ صدر ہوں گے، اور ٹونی بلیئر – عراق کو تباہ کرنے والا بڑا ظالم – وزیر اعظم ہوں گے۔ وہ فلسطین اور شام کو تقسیم کریں گے اور ہر کوئی اپنے مفادات حاصل کرے گا۔ پاکستان اپنے مفادات کے پیچھے ہے۔

مزاحمت کا تسلسل اور ضرورت
مزاحمت ختم نہیں ہوئی اور نہ ہی ختم ہوگی، کیونکہ مظلوم کے ظلم کا مقابلہ مزاحمت کے راستے سے ہی ہو سکتا ہے مذاکرات سے نہیں۔ مزاحمت کو اتار چڑھاؤ سے گزرنا پڑتا ہے۔ یہ غدار مزاحمت کو کنٹرول کرنے کی کوشش کریں گے۔ امن ہو یا جنگ، ٹرمپ کی قیادت میں دونوں ہی جرائم ہیں۔ یہ ایسا ہی ہے کہ شیطان نماز سے روکے یا نماز کا حکم دے ہر صورت میں جرم ہے۔

ٹرمپ کی قیادت اور عالمی ردعمل
ٹرمپ نے یہ امن معاہدہ اقوام متحدہ میں چھ بار کیوں ویٹو کیا؟ اگر ایسا وہاں نہیں کیا جاتا تو اسرائیل کو عالمی عدالت کی طرح جنگی مجرم سمجھا جاتا۔ ٹرمپ چاہتا تھا کہ یہ اس کی قیادت میں ہو اور یہ ظالم جج بن کر بیٹھ کر فیصلے کرے۔ اقوام متحدہ میں سلامتی کونسل کی دیگر اقوام اور امریکہ کی حیثیت ایک جیسی ہو گی۔ لیکن اب وہ سب امن معاہدے سے باہر ہو چکے ہیں اور امن معاہدے کی باگ ڈور ٹرمپ اور اسرائیل کے ہاتھ میں ہے۔
یہ احمق ٹرمپ کی تباہی کی نشانی ہے۔ اگرچہ چین مسلمان نہیں ہے لیکن وہ جانتا ہے کہ ٹرمپ شیطان ہے اور اس نے خود کو اس سے دور کر لیا ہے۔ چین اور روس نے اپنا راستہ خود بنا لیا ہے اور دوسری قومیں بھی ٹرمپ اور امریکہ کے متبادل راستے کے بارے میں سوچ رہی ہیں۔ چیخ و پکار کرنے والے ٹرمپ کے مقابلے چین اور روس خاموشی سے کام کر رہے ہیں۔

مسلمانوں کا کردار اور حقیقی امتحان
اس میں مرکزی کردار ان مسلمانوں کا ہے جو پہلے امتحان میں فیل ہو گئے تھے لیکن اب ان کے پاس امتحان پاس کرنے کا وقت ہے۔ انہیں فلسطینیوں کی حمایت کرنی چاہیے — اور تمام فلسطینیوں کی نہیں۔ کیونکہ دشمنوں نے حماس کا مقابلہ کرنے کے لیے فلسطین کے اندر دو سے تین گروپ بنائے ہیں۔ جب ہم فلسطینی کہتے ہیں تو اس کا مطلب محمود عباس یا PLA نہیں ہوتا۔ ہمیں صرف مزاحمتی گروہوں کا ساتھ دینا چاہیے اور انھیں زندہ رکھنے کے لیے ان کی آواز بننا چاہیے۔
ہمیں ظلم کو حق نہیں بننے دینا چاہیے۔ وہ مظلوم کو غلطی پر دکھانا چاہتے ہیں۔ ہمیں اب آواز اٹھانی ہوگی اور ظالموں کو ظالم اور مظلوم کو مظلوم قرار دینا ہوگا۔ ہمیں یہ پیغام زندہ ضمیر رکھنے والوں تک پہنچانا چاہیے کہ ظالم ہونے کے باوجود وہ مظلوموں کا لباس نہیں پہن سکتے۔

پاکستان کا کردار اور اسرائیل کو تسلیم کرنے کا خطرہ
پاکستان 78 سال سے ظالموں کے ساتھ کھڑا نہیں رہا، حالانکہ وہ مظلوموں کے ساتھ بھی نہیں کھڑا ہوا اور غیر جانبدار رہا۔ وہ پالیسی بھی اچھی نہیں تھی لیکن ظالموں کے ساتھ کھڑے ہونے کی اس پالیسی سے بہتر تھی۔ اب سب کہہ رہے ہیں کہ پاکستان جلد ہی ابراہم معاہدے کا حصہ بنے گا۔ پاکستان نے ایک بار پھر ٹرمپ کو نوبل امن انعام کے لیے سفارش کی ہے، حالانکہ ٹرمپ کبھی اس کا لائق نہیں ہو سکتا۔
جب وہاں پر سب کے سامنے ایسا گھٹیا کردار پیش کر کے آئے ہیں تو تصور کریں کہ وہ اسرائیل کو تسلیم کرنے کے لئے یہاں پر کیا کر رہے ہوں گے. مولانا فضل الرحمان کہہ رہے ہیں کہ اسرائیل کو تسلیم کرنے کی کوشش کی تو اسلام آباد کی طرف مارچ کریں گے۔ ٹرمپ یہاں آتا ہے، مذاکرات کرتا ہے اور پھر چلا جاتا ہے۔ اور یہ لوگ اپنی چاپلوسی کی اجرت مانگنے لگتے ہیں ملک کی کیا حیثیت ہے اس سے ان کو کئی مطلب نہیں۔ ان لوگوں نے اسرائیل کو تسلیم کرنا ہے اور کوئی ان کو اسرائیل کے ساتھ دوستی کرنے سے نہیں روک سکے گا ہم لوگ چاہے کتنا چیختے رہیں، لیکن زمینی سطح پر کچھ نہیں کر سکتے۔

لوگوں کا فرض اور غضب الٰہی کی تنبیہ
سب اپنا حصہ لے کر خاموش ہو جائیں گے۔ لیکن عوام کو چاہیے کہ اس رسوائی میں اپنا نام درج نہ کرے۔ حکومت تسلیم کر بھی لے تو عوام کو نہیں چاہیے۔ انہیں اپنی آواز بلند کرنی چاہیے، اپنے آپ کو الگ کرنا چاہیے اور دنیا کی نظروں میں فتح یاب ہونا چاہیے۔ عوام اپنے آپ کو حکمرانوں کے رحم و کرم پر نہ چھوڑیں اور اس ذلت کو اپنے گلے میں نہ ڈالیں کیونکہ یہ غضب الٰہی کی بنیاد بنے گا۔